Bashkimi ka fituar Superkupën e Kosovës në basketboll. Prizrenaset arritën të përsëritin suksesin e edicionit të kaluar, ku në finale shënuan fitore ndaj Peja 03 me shifrat 68:49 (15:11, 16:10, 18:14, 19:14).

Prizrenaset ishin më të mira në pjesën e parë, duke e fituar çerekun e parë 15:11, derisa të dytin 16:10, për të shkuar në pushim me dhjetë pikë dallim, 31:21.

Vashat nga Prizreni ruajtën epërsinë edhe në pjesën e dytë, për të triumfuar në fund 68:49.

Trofeun për kapitenen e Bashkimit, Aulona Muhadri e ka ndarë Fatmir Gashi, nënkryetar i Federatës së Basketbollit të Kosovës.

MVP e Superkupës së Femrave është shpallur Caterrion Thompson, e cila mbylli ndeshjen me 29 pikë dhe shtatë kërcime, derisa çmimin e ka ndarë Adriatik Rraci, Zëvendës Sekretar i Përgjithshëm i FBK-së.

Adriatik Rraci dhe Komesari i Garave në FBK, Faton Kurshumlija kanë ndarë medaljet e arta për Bashkimin, derisa të argjendtat, Xhenet Syka, Drejtoreshë për Kulturë, Rini dhe Sport në Komunën e Prizrenit dhe Valbona Bytyqi, ish-basketbolliste e Penzës dhe Kosovës.

Çmimin për organizatorin e ka ndarë Artina Hasani, Menaxhere për Evente dhe Basketbollin 3x3 në FBK, çmim të cilin e pranoi Erina Berisha nga KB Peja 03.  

Java e katërt e ProCredit Superligës do të sjellë përballje mjaft interesante.

Ndeshja e parë e kësaj xhiro është ndërmjet Vëllaznimit dhe Proton Cable Prizrenit, ku të dy skuadrat do të luftojnë për fitore. Kuqezinjtë kanë një fitore e dy humbje, derisa prizrenasit një fitore e një humbje.

Sfidë interesante është ajo mes ish-kampionëve, Pejës dhe Golden Eagle Yllit, ku të dy skuadrat verdhezi synimin e vetëm e kanë fitore në këtë takim. Pejanët kanë një fitore e një humbje, derisa therandasit një fitore e dy humbje.

Derbi i kësaj xhiro është mes skuadrave rivale dhe me traditë në basketbollin e Kosovës, Trepçës dhe Sigal Prishtinës. Të dy skuadrat në tri xhirot e para kanë nga dy fitore e një humbje. Mitrovicasit në edicionin e fundit fituan katër trofe, ku pikërisht në finalen e Superkupës shënuan fitore ndaj Sigal Prishtinës.

Java e katërt do të mbyllet me takimin ndërmjet Bashkimit dhe Borës. Prizrenasit janë skuadra e vetme pa humbje me tri fitore, kurse prishtinasit të vetmit pa fitore me tri humbje në tri xhirot e para.

ProCredit Superliga-Java 4

E shtunë

17:15 Vëllaznimi - Proton Cable Prizreni

19:00 Peja - Golden Eagle Ylli

E diel

17:15 Trepça - Sigal Prishtina

19:00 Bashkimi – Bora

Sonte është finalja e madhe në Superkupën e Femrave. Bashkimi dhe Peja 03 do të garojnë për trofeun e çmuar të basketbollit të Kosovës.

Ndeshja zhvillohet nga ora 19:00 në ‘Karagaçi’, aty ku po organizohet Superkupa e Femrave nga 30 shtatori.

Prizrenaset do të mundohen të fitojnë sërish trofeun e Superkupës, kurse pejanet për herë të parë në histori të klubit gjenden në finale të kësaj gare.

Bashkimi edicionin e kaluar kishte fituar tre trofetë: titullin, Kupën dhe Superkupën.

Bashkimi në gjysmëfinale kishte mundur Penzën 71:54, derisa Peja 03, në çerekfinale shënoi fitore ndaj Junior 06 Moni Bau 62:60 dhe gjysmëfinale ndaj Prishtinës 55:76.

Bashkimi është skuadra e vetme e pamposhtur në ProCredit Superligë.

Në ndeshjen e mbetur të xhiros së parë, prizrenasit kanë mundur kampionët e Kosovës, Trepçën me rezultat 71:64 (21:9, 11:18, 21:16, 18:21).

Të motivuar nga tifozët vendas, Portokallezinjtë e nisën sfidën më mirë, duke e fituar çerekun e parë 21:9. Megjithatë, ‘Xehetarët’ dalëngadalë u rikthyen për të afruar shifrat në 22:21, kurse pjesa e parë përfundoi 32:27.

Prizrenasit sërish u shkëputën në periodën e tretë në 41:27 dhe deri në fund përkundër tentimeve nga kampionët, ruajtën epërsinë dhe fituan 71:64.

Te vendasit, Mack Smith kishte 17 pikë e gjashtë kërcime dhe Lejson Zeqiri kishte 18 pikë e pesë kërcime, kurse te mysafirët Larry Thomas kishte 19 pikë e shtatë kërcime.

Bashkimi ka tri fitore në tri ndeshje, kurse Trepça dy fitore e një humbje.